ഗുരുവായൂർ ദേവസ്വം ബോർഡ് ചെയർമാനായി എ.വി. ഗോപിനാഥും ഇതോടൊപ്പം സി.പി.ഐ പ്രതിനിധിയായ എം.യു. ഷിനിജയും വീണ്ടും സത്യപ്രതിജ്ഞ ചെയ്യും. അംഗങ്ങളെ നിയമിച്ചുകൊണ്ടുള്ള സർക്കാർ ഉത്തരവിൽ കടന്നുകൂടിയ സാങ്കേതിക പിഴവാണ് ഇതിന് കാരണമായത്. കഴിഞ്ഞ ഞായറാഴ്ച ഇരുവരും ചുമതലയേറ്റിരുന്നെങ്കിലും, പഴയ ഉത്തരവിലെ അവ്യക്തതകൾ ഭരണസമിതിയുടെ ഭാവി തീരുമാനങ്ങളെ ബാധിക്കാതിരിക്കാൻ സർക്കാർ ഉത്തരവ് തിരുത്തി പുതുക്കി ഇറക്കുകയായിരുന്നു.
മുൻപ് പുറത്തിറങ്ങിയ ഉത്തരവിലെ പിഴവുകൾ ശ്രദ്ധയിൽപ്പെട്ടതിനെത്തുടർന്ന് മാർച്ച് 11-നാണ് സർക്കാർ പുതിയ ഉത്തരവ് പുറപ്പെടുവിച്ചത്. ദേവസ്വം കമ്മീഷണറുടെ ഔദ്യോഗിക അനുമതി ലഭിക്കുന്ന മുറയ്ക്ക് നാളെയോ മറ്റന്നാളോ പുനർ സത്യപ്രതിജ്ഞാ ചടങ്ങുകൾ നടക്കും.
ഏകദേശം 48 വർഷത്തെ നീണ്ട ഇടവേളയ്ക്ക് ശേഷമാണ് ഗുരുവായൂർ ദേവസ്വം ഭരണസമിതിയിലേക്ക് ഒരു വനിതാ അംഗം എത്തുന്നത് എന്ന പ്രത്യേകത ഷിനിജയുടെ നിയമനത്തിനുണ്ട്.സത്യപ്രതിജ്ഞാ ചടങ്ങുകൾ പുനരാരംഭിക്കാനുള്ള നീക്കങ്ങൾക്കിടെ, ഭരണസമിതിയുടെ നിയമനം നിയമപോരാട്ടത്തിലേക്ക് നീങ്ങുകയാണ്.
അംഗങ്ങളെ നാമനിർദ്ദേശം ചെയ്ത രീതിയിൽ ക്രമക്കേടുണ്ടെന്ന് ആരോപിച്ച് മുൻ ദേവസ്വം അംഗം നൽകിയ ഹർജി ഹൈക്കോടതി ഫയലിൽ സ്വീകരിച്ചു. വിഷയത്തിൽ സർക്കാരിനും ഗുരുവായൂർ ദേവസ്വത്തിനും കോടതി നോട്ടീസ് അയച്ചിട്ടുണ്ട്. കോടതി നടപടികൾ തുടരുന്ന സാഹചര്യത്തിൽ പുതിയ സത്യപ്രതിജ്ഞാ നീക്കം ഏറെ നിർണ്ണായകമാണ്.
