രാഹുൽ മാങ്കൂട്ടത്തിലിനെതിരെ ചുമത്തിയിരിക്കുന്ന മൂന്ന് ലൈംഗികാതിക്രമ കേസുകളിൽ ആദ്യത്തേതിൽ കേരള ഹൈക്കോടതി മുൻകൂർ ജാമ്യം അനുവദിച്ചു. ഇത് നിലവിലുള്ള എല്ലാ കേസുകളിലും അറസ്റ്റിൽ നിന്ന് രാഹുൽ മാങ്കൂട്ടത്തിലിന് സംരക്ഷണം ഉറപ്പാക്കി.
പ്രഥമദൃഷ്ട്യാ ആരോപണങ്ങൾ ബലാത്സംഗക്കേസ് സ്ഥാപിക്കുന്നില്ലെന്ന് കോടതി ചൂണ്ടിക്കാട്ടിയപ്പോൾ, കേരളം വിട്ടുപോകരുതെന്നും പാസ്പോർട്ടും മൊബൈൽ ഫോണും അന്വേഷണ ഉദ്യോഗസ്ഥർക്ക് കൈമാറണമെന്നുമുള്ള കർശന വ്യവസ്ഥകൾ ഉൾപ്പെടെയുള്ള മുൻകൂർ ജാമ്യത്തിന് കോടതി കർശന വ്യവസ്ഥകൾ ഏർപ്പെടുത്തി. അതേസമയം പരാതിക്കാരിയെ ബന്ധപ്പെടുന്നതിനോ സാക്ഷികളെ സ്വാധീനിക്കുന്നതിനോ കർശനമായി വിലക്കിയിട്ടുണ്ട്.
കേസിൽ മുൻകൂർ ജാമ്യം നിഷേധിച്ച തിരുവനന്തപുരം സെഷൻസ് കോടതി വിധിയെ ചോദ്യം ചെയ്ത് പാലക്കാട് എംഎൽഎ സമർപ്പിച്ച ഹർജിയിൽ ജസ്റ്റിസ് കൗസർ എടപ്പഗത്ത് ഇളവ് അനുവദിച്ചു. മൂന്ന് കേസുകളിൽ രണ്ടെണ്ണത്തിൽ അറസ്റ്റിൽ നിന്ന് സംരക്ഷണം ലഭിക്കാൻ കഴിഞ്ഞെങ്കിലും, മൂന്നാമത്തെ കേസിൽ അറസ്റ്റിലായ രാഹുൽ രണ്ടാഴ്ചയിലധികം കസ്റ്റഡിയിൽ കഴിയുകയും ജാമ്യം ലഭിക്കുകയും ചെയ്തു.
പത്തനംതിട്ട ജില്ലാ സെഷൻസ് കോടതിയായിരുന്ന ജാമ്യം അനുവദിച്ചത്. മാവേലിക്കര സ്പെഷ്യൽ സബ് ജയിലിലായിരുന്നു രാഹുലിനെ പാർപ്പിച്ചത്. വിവാഹവാഗ്ദാനം നൽകി ഹോട്ടലിൽ വിളിച്ചുവരുത്തി യുവതിയെ പീഡിപ്പിച്ച് ഗർഭിണിയാക്കിയെന്ന മൂന്നാം ബലാത്സംഗ പരാതിയിൽ ജനുവരി 14നാണ് രാഹുലിനെ പ്രത്യേക അന്വേഷണ സംഘം അറസ്റ്റ് ചെയ്തത്.
പാലക്കാട്ടെ ഹോട്ടൽ മുറിയിൽവെച്ച് അർധരാത്രിയിലായിരുന്നു അറസ്റ്റ്. പിന്നാലെ രാഹുലിനെ റിമാൻഡിൽ വിടുകയും ശേഷം പോലീസ് കസ്റ്റഡിയിൽ വിടുകയും ചെയ്തിരുന്നു. പ്രതിയും പരാതിക്കാരിയും തമ്മിലുണ്ടായിരുന്നത് ഉഭയസമ്മതപ്രകാരമുള്ള ബന്ധമായിരുന്നു എന്ന വാദം പ്രതിഭാഗം കോടതിയിൽ ഉന്നയിച്ചു.
രാഹുലിനെതിരെയുള്ള കേസുകൾ രാഷ്ട്രീയ പ്രേരിതമാണെന്നും ഇതിന് പിന്നിൽ ഗൂഢാലോചന ഉണ്ടെന്നും പ്രതിഭാഗം വാദിച്ചു. കേസിൽ ഇതുവരെ പരാതിക്കാരി നേരിട്ട് പോലീസിന് മൊഴി നൽകിയിട്ടില്ലെന്നും രഹസ്യമൊഴിയോ വൈദ്യപരിശോധനയോ ഉൾപ്പെടെയുള്ള നടപടികൾ പൂർത്തിയായിട്ടില്ലെന്നും പ്രതിഭാഗം ചൂണ്ടിക്കാട്ടി.
ദേഹോപദ്രവം, സാമ്പത്തിക ചൂഷണം, നിർബന്ധിത ഗർഭച്ഛിദ്രം അടക്കമുള്ള ആരോപണങ്ങളാണ് രാഹുലിനെതിരായ പരാതിയിലുള്ളത്. എന്നാൽ പത്തനംതിട്ട എആർ ക്യാമ്പിലെ ചോദ്യം ചെയ്യലിൽ രാഹുൽ എല്ലാം നിഷേധിച്ചിരുന്നു. ഉഭയസമ്മതപ്രകാരമുള്ള ലൈംഗികബന്ധമാണ് യുവതിയുമായി ഉണ്ടായതെന്നായിരുന്നു രാഹുൽ ചോദ്യം ചെയ്യലിൽ ആവർത്തിച്ചത്.
