കടബാധ്യത ഇന്ത്യയിലെ സംസ്ഥാനങ്ങളിൽ സാമ്പത്തിക പ്രതിസന്ധിയുടെ ഭീഷണി ഉയർത്തുന്നുയെന്ന് സിഎജി.2022–23 ൽ അവസാനിച്ച ദശകത്തിൽ രാജ്യത്തെ സംസ്ഥാനങ്ങളുടെ പൊതു കടത്തിൽ മൂന്നിരട്ടിയിലധികം വർധനവുണ്ടായതായി കംപ്ട്രോളർ ആൻഡ് ഓഡിറ്റർ ജനറൽ ഓഫ് ഇന്ത്യ (സിഎജി) റിപ്പോർട്ട് ചെയ്തു.
ന്യൂഡൽഹിയിൽ നടന്ന സംസ്ഥാന ധനകാര്യ സെക്രട്ടറിമാരുടെ സമ്മേളനത്തിലാണ് സിഎജി ഈ റിപ്പോർട്ട് അവതരിപ്പിച്ചത്. 28 ഇന്ത്യൻ സംസ്ഥാനങ്ങളുടെയും മൊത്തം പൊതു കടം 2013-14ൽ 17.57 ലക്ഷം കോടി രൂപയിൽ നിന്ന് 2022-23ൽ 59.6 ലക്ഷം കോടി രൂപയായി ഉയർന്നതായി സിഎജി വെളിപ്പെടുത്തി.
ഇതേ കാലയളവിൽ, സംസ്ഥാനങ്ങളുടെ ശരാശരി കടം-മൊത്ത ആഭ്യന്തര ഉൽപ്പാദന അനുപാതം 16.66 ശതമാനത്തിൽ നിന്ന് 23 ശതമാനമായി ഉയർന്നു.ഇത് കൂടുതൽ ആശങ്കാജനകമെന്നാണ് സിഎജിയുടെ റിപ്പോർട്ടിൽ വ്യക്തമാക്കിയിട്ടുള്ളത്.പൊതു കടത്തിന്റെ കാര്യത്തിൽ. കേരളത്തിന്റെ സാമ്പത്തിക സ്ഥിതി രാജ്യത്തിന്റെ ശരാശരിയേക്കാൾ മോശമാണ് എന്നും റിപ്പോർട്ട് ചൂണ്ടിക്കട്ടുന്നു..
കേരളത്തിന്റെ കടബാധ്യത വർദ്ധിച്ചുവരികയാണ്. 2025-26 അവസാനത്തോടെ സംസ്ഥാനത്തിന്റെ മൊത്തം ബാധ്യതകൾ ഏകദേശം 4.65 ലക്ഷം കോടി രൂപയിലെത്തുമെന്നാണ് സമീപകാല ബജറ്റ് പ്രവചനങ്ങളും ഓഡിറ്റ് നിരീക്ഷണങ്ങളും സൂചിപ്പിക്കുന്നത് .
മുൻകാലങ്ങളിലെ ഏറ്റവും ഉയർന്ന നിലയേക്കാൾ കടം-ജിഎസ്ഡിപി അനുപാതം നേരിയ തോതിൽ കുറയ്ക്കാൻ കേരളത്തിന് കഴിഞ്ഞിട്ടുണ്ടെങ്കിലും, ദൈനംദിന ചെലവുകൾ നിറവേറ്റുന്നതിനായി വായ്പകളെ ആശ്രയിക്കുന്നതിനെക്കുറിച്ചുള്ള ആശങ്കകൾ ഇപ്പോഴും നിലനിൽക്കുന്നുയെന്ന് സിഎജി ചൂണ്ടിക്കാണിക്കുന്നു. ഈ പ്രവണത പല ഇന്ത്യൻ സംസ്ഥാനങ്ങളിലും കാണപ്പെടുന്നുണ്ട് .
ലഭ്യമായ ഏറ്റവും പുതിയ കണക്കുകൾ പ്രകാരം, 2022-23 സാമ്പത്തിക വർഷത്തിന്റെ അവസാനത്തിൽ കേരളത്തിന്റെ മൊത്തം ബാധ്യതകൾ 3.88 ലക്ഷം കോടി രൂപയായിരുന്നു, മൊത്ത സംസ്ഥാന ആഭ്യന്തര ഉത്പാദനം (GSDP) 10.17 ലക്ഷം കോടി രൂപയായിരുന്നു. ഇത് 38.23 ശതമാനമായ കടം-ജി എസ് ഡി പി അനുപാതത്തിലേക്ക് മാറുന്നു .സംസ്ഥാനത്തിന്റെ ധനകാര്യ ഉത്തരവാദിത്ത ചട്ടക്കൂടിന് കീഴിൽ ശുപാർശ ചെയ്യുന്ന 34.5 ശതമാനം പരിധിയേക്കാൾ ഇത് വളരെ കൂടുതലാണ് എന്നാണ് റിപ്പോർട്ടുകൾ ചൂണ്ടിക്കാണിക്കുന്നത്.
2024-25 സാമ്പത്തിക വർഷത്തെ സംസ്ഥാന ബജറ്റിൽ കേരള ധനമന്ത്രി കെ എൻ ബാലഗോപാൽ, 2025 മാർച്ചോടെ സംസ്ഥാനത്തിന്റെ ബാധ്യതകൾ 4.31 ലക്ഷം കോടി രൂപയാകുമെന്ന് പറഞ്ഞിരുന്നു.ആ വർഷം ജി .എസ് .ഡി .പി 12.75 ലക്ഷം കോടി രൂപയായി ഉയരുമെന്ന് പ്രതീക്ഷിക്കുന്നതിനാൽ, കടം-ജി .എസ് .ഡി .പി അനുപാതം ഏകദേശം 33.8 ശതമാനമായി നേരിയ തോതിൽ കുറയ്ക്കുമെന്ന് സർക്കാർ പ്രതീക്ഷിക്കുന്നു.
എന്നിരുന്നാലും, നിലവിലെ വായ്പാ പ്രവണതകളും ധനക്കമ്മിയുടെ തുടർച്ചയും അടിസ്ഥാനമാക്കി, 2025-26 സാമ്പത്തിക വർഷത്തോടെ മൊത്തം ബാധ്യതകൾ 4.65 ലക്ഷം കോടി രൂപയിലെത്തുമെന്നാണ് കരുതുന്നത്.
കടബാധ്യത കൂടുതലുള്ള സംസ്ഥാനങ്ങളുടെ പട്ടികയിൽ കേരളം ഒന്നാം സ്ഥാനത്താണ്. പഞ്ചാബ് (40.35 ശതമാനം), നാഗാലാൻഡ് (37.15 ശതമാനം), പശ്ചിമ ബംഗാൾ (33.70 ശതമാനം) എന്നിവയാണ് ജിഡിപിയുമായി താരതമ്യപ്പെടുത്തുമ്പോൾ ഏറ്റവും വലിയ കടബാധ്യത രേഖപ്പെടുത്തിയ മറ്റു സംസ്ഥാനങ്ങൾ .
മറുവശത്ത്, ഒഡീഷ (8.45 ശതമാനം), മഹാരാഷ്ട്ര (14.64 ശതമാനം), ഗുജറാത്ത് (16.37 ശതമാനം) എന്നിവ താരതമ്യേന ആരോഗ്യകരമായ സാമ്പത്തിക സ്ഥിതി നിലനിർത്തിയിട്ടുണ്ട് .
സർക്കാരുകൾ റവന്യൂ ചെലവുകൾക്കായിട്ടല്ല, മൂലധന ചെലവുകൾക്കായി മാത്രമേ വായ്പ എടുക്കാവൂ എന്ന പൊതു ധനകാര്യത്തിന്റെ ‘സുവർണ്ണ നിയമം’ പല സംസ്ഥാനങ്ങളും ലംഘിച്ചതായി സിഎജി ചൂണ്ടിക്കാട്ടി. 2023 സാമ്പത്തിക വർഷത്തിൽ കേരളം, ആന്ധ്രാപ്രദേശ്, പഞ്ചാബ്, പശ്ചിമ ബംഗാൾ, തമിഴ്‌നാട്, ബീഹാർ എന്നിവയുൾപ്പെടെ 11 സംസ്ഥാനങ്ങൾ അവരുടെ വായ്പകളുടെ ഒരു ഭാഗം റവന്യൂ കമ്മി നികത്തുന്നതിനായി വഴിതിരിച്ചുവിട്ടു.
2026 ലെ സംസ്ഥാന തിരഞ്ഞെടുപ്പിന് മുന്നോടിയായി കേരളം സാമ്പത്തിക രൂപരേഖ തയ്യാറാക്കാൻ തയ്യാറെടുക്കുമ്പോൾ, കടം വാങ്ങലുകൾ നിയന്ത്രിക്കാനും, വരുമാന വർദ്ധനവ് മെച്ചപ്പെടുത്താനും, ചെലവ് മുൻഗണനകൾ വീണ്ടും കേന്ദ്രീകരിക്കാനുമുള്ള സമ്മർദ്ദം വർദ്ധിക്കും.
