നടൻ സൗബിൻ ഷാഹിറിന് മറ്റൊരു കുരുക്ക് .അദ്ദേഹത്തിൻ്റെ വിദേശയാത്രയ്ക്ക് അനുമതി നിഷേധിച്ചു. ദുബായിൽ ഒരു അവാർഡ് ദാന ചടങ്ങിൽ പങ്കെടുക്കാനുള്ള അപേക്ഷയാണ് എറണാകുളം മജിസ്‌ട്രേറ്റ് കോടതി തള്ളിയത് .മഞ്ഞുമ്മൽ ബോയ്‌സ് എന്ന സിനിമയുമായി ബന്ധപ്പെട്ട സാമ്പത്തിക തട്ടിപ്പ് കേസുമായി ബന്ധപ്പെട്ടാണ് അനുമതി നിഷേധിച്ചത്.
‘മഞ്ഞുമ്മൽ ബോയ്‌സ്’ എന്ന ചിത്രത്തിലെ നടൻ സെപ്റ്റംബർ 5 ന് യുഎഇയിൽ നടക്കുന്ന അവാർഡ് ഷോയിൽ പങ്കെടുക്കാൻ യാത്ര ചെയ്യാൻ അനുമതി തേടിയിരുന്നു. ജൂലൈയിൽ സൗബിൻ അറസ്റ്റിലായെങ്കിലും അതേ ദിവസം തന്നെ മുൻകൂർ ജാമ്യത്തിൽ പുറത്തിറങ്ങി. പിന്നീട് വിദേശയാത്രയ്ക്ക് ജാമ്യ വ്യവസ്ഥകളിൽ ഇളവ് തേടി അദ്ദേഹം കോടതിയെ സമീപിച്ചു.
അരൂർ സ്വദേശിയായ സിറാജ് വലിയതറ ഹമീദ് നൽകിയ പരാതിയുടെ അടിസ്ഥാനത്തിലാണ് കൊച്ചി മരട് പോലീസ് കേസെടുത്തത് . നടനും നിർമ്മാതാവുമായ സൗബിൻ ഷാഹിർ, പറവ ഫിലിംസിന്റെ നിർമ്മാതാക്കളായ ബാബു ഷാഹിർ, ഷോൺ ആന്റണി എന്നിവർ ചേർന്ന് ‘മഞ്ഞമ്മൽ ബോയ്‌സി’ൽ സിറാജ് ഏഴ് കോടി രൂപ നിക്ഷേപിച്ചാൽ 40 ശതമാനം ലാഭവിഹിതം വാഗ്ദാനം ചെയ്തതായി പരാതിയിൽ ആരോപിക്കുന്നു. ചിത്രം ബ്ലോക്ക്ബസ്റ്ററായിട്ടും, ലാഭത്തിന്റെ വിഹിതം തനിക്ക് നൽകിയിട്ടില്ലെന്ന് സിറാജ് അവകാശപ്പെട്ടു.
