ഓണാഘോഷത്തിനിടെ സുഹൃത്തുക്കള്‍ക്കൊപ്പം മത്സരിച്ച് മദ്യം കഴിച്ച വിദ്യാര്‍ത്ഥിയെ ഗുരുതരാവസ്ഥയില്‍ ആശുപത്രി തീവ്രപരിചണ വിഭാഗത്തില്‍ പ്രവേശിപ്പിച്ചു.
ഇന്നലെ തിരുവനന്തപുരം ആല്‍ത്തറയിലെ പണി പുരോഗമിക്കുന്ന വീട്ടിലാണ് നഗരത്തിലെ വിവിധ സ്‌കൂളുകളിലെ ഏഴ് വിദ്യാര്‍ത്ഥികള്‍ ഒത്തുകൂടി അമിതമായി മദ്യപിച്ചത്. ഇതില്‍ പ്ലസ് ടു വിദ്യാര്‍ത്ഥിയാണ് കുഴഞ്ഞു വീണത്. ഇതോടെ ഒപ്പമുണ്ടായിരുന്ന അഞ്ചു പേര്‍ ഓടി രക്ഷപ്പെട്ടു.
ഒപ്പമുണ്ടായിരുന്ന ഒരു വിദ്യാര്‍ത്ഥിയാണ് മ്യൂസിയം പൊലിസിനെ വിവരം അറിയിച്ചത്. പൊലീസാണ് സ്ഥലത്തെത്തി വിദ്യാര്‍ത്ഥിയെ ആംബുലന്‍സില്‍ മെഡിക്കല്‍ കോളേജ് ആശുപത്രിയിലെത്തിച്ചത്. തീര്‍ത്തും അവശനായ വിദ്യാര്‍ത്ഥിയെ തീവ്രപരിചണ വിഭാഗത്തിലേക്ക് മാറ്റുകയായിരുന്നു. സംഭവത്തില്‍ മ്യൂസിയം പൊലീസ് ഇതു വരെ കേസൊന്നും രജിസ്റ്റര്‍ ചെയ്തിട്ടില്ല. വിവിധ സ്‌കൂകളിലെ കുട്ടികള്‍ ചേര്‍ന്നാണ് മദ്യപിച്ചത്. ഓണാഘോഷത്തിന് മുണ്ടുടുത്തെത്തിയ വിദ്യാര്‍ത്ഥികള്‍ ബെവ്‌ക്കോ ഔട്ട് ലെറ്റില്‍ പോയാണ് മദ്യം വാങ്ങിയത്.
(കവർ ഫോട്ടോ സാങ്കല്പികമാണ്.മദ്യപാനം ആരോഗ്യത്തിനു ഹാനികരം )
