കൊച്ചി: കലൂർ സ്റ്റേഡിയത്തിൽ മൃദംഗവിഷൻ സംഘടിപ്പിച്ച ഗിന്നസ് റെക്കോഡ് നൃത്ത പരിപാടിക്കായി കലൂര്‍ ജവഹർലാൽ നെഹ്രു സ്റ്റേഡിയം വിട്ടുനൽകിയതുമായി ബന്ധപ്പെട്ട് ജിസിഡിഎ ചെയർമാൻ കെ ചന്ദ്രൻ പിള്ളയ്ക്കെതിരെ അഴിമതിയാരോപണം.
ഗിന്നസ് റെക്കോഡ് നൃത്ത പരിപാടിക്കായി സ്റ്റേഡിയം വിട്ടുനൽകാൻ അനുമതി നൽകുന്നതിനു ഉന്നതരുടെ ഇടപെടലുണ്ടായെന്നാണ് റിപ്പോർട്ടുകൾ. അനുമതി നൽകിയത് സംബന്ധിച്ച രേഖകൾ വിവിധ മാധ്യമങ്ങൾ പുറത്തു വിടുകയും ചെയ്തു . ഈ സാഹചര്യത്തിൽ അനേഷണം നടത്തി കെ ചന്ദ്രൻ പിള്ളയ്ക്കെതിരെ നടപടി സ്വീകരിക്കണമെന്ന ആവശ്യം ശക്തിപ്പെടുകയാണ്. അന്വേഷണം നടക്കുന്ന കാലയളവിൽ അദ്ദേഹം ചെയർമാൻ സ്ഥാനത്തു നിന്നും മാറി നിൽക്കണമെന്നും പ്രതികരണങ്ങൾ ഉയരുന്നുണ്ട്. പ്രതിപക്ഷ പാർട്ടികൾ ചന്ദ്രൻ പിള്ളയുടെ രാജി ആവശ്യപ്പെട്ട് പ്രക്ഷോഭങ്ങൾക്ക് ഒരുക്കം തുടങ്ങിയതായാണ് അറിയുന്നത്.
പരിപാടിക്കായി സ്റ്റേഡിയം വിട്ടുനൽകാനാകില്ലെന്നാണ് സ്റ്റേഡിയം അധികൃതർ ആദ്യം റിപ്പോർട്ട് നൽകിയിരുന്നത്. എന്നാൽ ഈ തീരുമാനം അട്ടിമറിച്ചാണ് പിന്നീട് സ്റ്റേഡിയം മൃദംഗവിഷന് വിട്ടുനൽകുന്നത്. കായിക ഇതര ആവശ്യത്തിന് സ്റ്റേഡിയം വിട്ടു നൽകിയത് വഴിവിട്ട നീക്കത്തിലൂടെയാണെന്ന് ആരോപിച്ച് കൊച്ചി സ്വദേശിയായ ചെഷയര്‍ ടാര്‍സന്‍ വിജിലന്‍സ് ഡയറക്ടര്‍ക്ക് പരാതി സമര്‍പ്പിച്ചു .
ഗിന്നസ് റെക്കോർഡ് ലക്ഷ്യമിട്ട് പരിപാടി നടത്താൻ സ്റ്റേഡിയം വിട്ടുനൽകണമെന്ന് ആവശ്യപ്പെട്ട് മൃദംഗവിഷൻ 23.8.2024 നാണ് അപേക്ഷ നൽകുന്നത്. ജി.സി.ഡി.എ ചെയര്‍മാന്‍ ചന്ദ്രന്‍പിള്ളക്കായിരുന്നു അപേക്ഷ സമര്‍പ്പിച്ചത് ഏകദേശം ഒരു മാസത്തിന് ശേഷം ചന്ദ്രൻപിള്ള ഈ അപേക്ഷ സ്റ്റേഡിയത്തിന്‍റെ എസ്റ്റേറ്റ് വിഭാഗത്തിന് കൈമാറി.
2025 ഏപ്രിൽ വരെ സ്റ്റേഡിയം ബ്ലാസ്റ്റേഴ്സിന് മാത്രമായി നൽകിയിരിക്കുകയായിരുന്നതിനാൽ സ്റ്റേഡിയം വിട്ടുനൽകാനാവില്ല എന്നായിരുന്നു എസ്റ്റേറ്റ് വിഭാഗത്തിൻ്റെ തീരുമാനം. ഫുട്ബോളിന് വേണ്ടി മാത്രം നൽകിയിരിക്കുകയാണ് സ്റ്റേഡിയം. അതിനാൽ ഈ അപേക്ഷ പരിഗണിക്കാനാവില്ല. അന്താരാഷ്ട്ര നിലവാരത്തില്‍ സജ്ജീകരിച്ചിരിക്കുന്ന ടർഫ് സ്റ്റേഡിയത്തിലുണ്ട്. മറ്റ് പരിപാടികൾ നടത്തുന്നത് ടർഫിനെ ബാധിച്ചേക്കുമെന്നും എസ്റ്റേറ്റ് വിഭാഗം കണ്ടെത്തിയതായി ജി.സി.ഡി.എ. രേഖകളിൽ പറയുന്നു. അപേക്ഷ പരിഗണിക്കാനാകില്ലെന്ന് എസ്റ്റേറ്റ് ഓഫീസർ ഫയലിൽ രേഖപ്പെടുത്തി. ഫിഫ നിലവാരത്തിൽ സ്റ്റേഡിയം നിലനിർത്തേണ്ടതിനാൽ നൃത്തപരിപാടിക്ക് നൽകാനാകില്ലെന്നായിരുന്നു ഫയലിൽ മറുപടി നൽകിയത്. എന്നാൽ ഇത് മറികടന്നാണ് സ്റ്റേഡിയം അനുവദിച്ചതെന്ന് രേഖകളിൽ വ്യക്തമാണ്.
ജനപ്രതിനിധികളടങ്ങുന്ന ജനറൽ കൗൺസിലാണ് സ്റ്റേഡിയം വിട്ട് നൽകുന്നതിന് അംഗീകാരം നൽകേണ്ടത്. എന്നാൽ ഇത് മറികടന്ന് ചെയർമാൻ കെ ചന്ദ്രൻപിള്ള വഴിവിട്ട് അനുമതി നൽകുകയായിരുന്നു. വാടക നിശ്ചയിച്ചതും ചെയർമാൻ കെ ചന്ദ്രൻപിള്ളയാണ്. ഇതിൽ സാമ്പത്തിക അഴിമതിയുണ്ടെന്നാണ് പരാതി.
ബ്ലാസ്റ്റേഴ്സുമായുള്ള കരാർ നിലനിൽക്കുന്നതിനാൽ അവരിൽ നിന്ന് ഒരു നിരാക്ഷേപപത്രം ലഭിച്ചാൽ സ്റ്റേഡിയം നൽകാനാകുമെന്ന് ഒരു ധാരണ ഉണ്ടാക്കുന്നു. അതിനുശേഷം എൻ.ഒ.സി. കിട്ടിയതായി കാണിച്ച് കാര്യങ്ങൾ വേഗത്തിലാക്കുന്നു. ഒന്നോ രണ്ടോ ദിവസങ്ങൾ കൊണ്ടാണ് ഇക്കാര്യങ്ങളെല്ലാം പൂർത്തിയായതെന്നും രേഖകളിൽ നിന്ന് വ്യക്തമാണ്.
സി പി ഐ എം നേതാവായ കെ ചന്ദ്രൻ പിള്ളക്കെതിരെ ആദ്യമായാണ് ഒരു അഴിമതി ആരോപണം വരുന്നത്. ഒരുകാലത്ത് വിഎസ് അച്യുതാനന്ദനോടൊപ്പം നിലയുറപ്പിച്ചിരുന്ന ചന്ദ്രൻപിള്ള ക്ളീൻ ഇമേജിനുടമയായിരുന്നു. അതിനാണിപ്പോൾ കോട്ടം സംഭവിച്ചത്. അതിനാൽ അനേഷണം നടത്തി സത്യാവസ്ഥ പുറത്തു വരുന്നത് അദ്ദേഹത്തിന്റെ കൂടി ആവശ്യമായി മാറിയിരിക്കുന്നു.
