ശ്രീശാന്തിന്‍റെ വീട്ടിൽ തീപിടിത്തം; ഒരുമുറി പൂർണമായും കത്തിനശിച്ചു

203

കൊച്ചി: ക്രിക്കറ്റ് താരം ശ്രീശാന്തിന്‍റെ ഇടപ്പള്ളിയിലുള്ള വീട്ടിൽ തീപിടിത്തം. വീടിന്‍റെ ഒരുമുറി പൂർണമായും കത്തിനശിച്ചു എന്നാണ് വിവരം. പുലർച്ചെ രണ്ടുമണിയോടെയാണ് സംഭവം നടന്നത്. വീടിന്‍റെ താഴത്തെ നിലയിലെ മുറിയിലാണ് തീപിടിത്തം ഉണ്ടായത്. ശ്രീശാന്തിന്‍റെ ഭാര്യയും കുട്ടിയും ജോലിക്കാരുമായിരുന്നു ഈ സമയത്ത് വീട്ടിലുണ്ടായിരുന്നത്.

വീട്ടിൽ നിന്ന് വലിയതോതിലുള്ള തീയും പുകയും ഉയരുന്നത് കണ്ട അയൽവാസികൾ ഫയർഫോഴ്സിനെ വിവരമറിയിക്കുകയായിരുന്നു. തൃക്കാക്കര, ഗാന്ധിനഗർ എന്നി നിലയങ്ങളിലെ ഫയർഫോഴ്സ് സംഘം സ്ഥലത്തെത്തി തീ അണയ്ക്കുകയായിരുന്നു.

ശ്രീശാന്തിന്‍റെ ഭാര്യയും കുട്ടികളുമുൾപ്പെടെ ഉള്ളവരെ ഗ്ലാസ് തുറന്ന് പുറത്തെത്തിക്കുകയായിരുന്നു. തീപടർന്നതിനാൽ ഇവർക്ക് പുറത്തേക്കിറങ്ങാൻ സാധിച്ചിരുന്നില്ല. ഫയർഫോഴ്സ് എത്തിയാണ് ഇവരെ പുറത്തെത്തിച്ചത്. അപകടത്തിൽ ആർക്കും പരുക്കില്ല.